2000-ci ilin avqustunda Azərbaycan Respublikasının Milli Elmlər Akademiyası və Təhsil Nazirliyinin əsasında aparıcı elmi-tədqiqat və universitetlər tərəfindən Azərbaycan Elmi-Tədqiqat və Təhsil Şəbəkələri Assosiasiyası (AzRENA) təsis edildi. Assosiasiya qeyri-hökumət təşkilatı olub akademiya və tədris müəssisələri üçün açıqdır.

AzRENA-nın fəaliyyət stratgeiyası aşağıdakı məsələlərin həllinə istiqamətlənmişdir:

• regional şəbəkələrin və regional tədris mərkəzlərinin inkişafı;
• Bakı şəhərinin daxili infrastrukturunun təkmilləşdirilməsi;
• milli informasiya ehtiyatlarının inkişafı;
• yüksək sürətli xarici birləşməyə malik İnternet vasitəsilə elm və təhsil sahəsində informasiya mübadiləsinin həyata keçirilməsi;
• distant təlim, E-işlər və distant təhsil sistemlərinin yaradılması;
• təhsil və elm şəbəkələrinin inkişafı ilə bağlı olan təşkilatlarla əməkdaşlıq.

AzRENA-nın təhsil şəbəkəsinin İnternetə qoşulması Dövlət İqtisad Universitetində və Azərbaycan Milli Elmlər Akademiyasında yerləşən, 1 Mbps buraxılış qabiliyyətli kanalla İnternetə çıxış imkanına malik iki NOC (Network Operations Center) vasitəsilə assimmetrik rejimdə həyata keçirilir. Bakı şəhərinin təhsil və akademiya müəssisələri əməliyyat mərkəzləri ilə birləşdirici xətlər və Radio-Ethernet vasitəsilə əlaqələndirilir. AzRENA-nın bu şəbəkə infrastrukturu Assosiasiya üzvlərinin infrastrukturunun təkmilləşdirilməsi və AzRENA-nın dayaq şəbəkəsinə qoşulmasına dair layihə çərçivəsində genişləndirilmişdir (NATO Grant NIG 976370).

AzRENA şəbəkəsinin sabit peyk rabitə kanalı vasitəsilə İnternetə yüksək sürətli çıxışı "Virtual İpək Yolu" layihəsi çərçivəsində həyata keçiriləcəkdir. Həmin layihənin reallaşması kanalların buraxılış qabiliyyətini zəmanətli 3 Mbps-dən 24 Mbps-yə kimi artırmaq imkanı verir.

AzRENA şəbəkəsində 15-ə qədər təhsil və elm mərkəzləri cəmləşmişdir. Bugün AzRENA vasitəsilə İnternetə 900-dən yuxarı işçi stansiya qoşulur ki, onlar da 6000 istifadəçiyə xidmət göstərir.

AzRENA-nın şəbəkə infrastrukturunun qurulma texnologiyasının çevik və mobil olması respublikanın şəhər və rayonlarında regional təhsil və akademiya şəbəkələrini yaratmağa və onları ümumi şəbəkədə birləşdirməyə imkan verir.

Azərbaycanda qeyri-kommersiya təhsil və elm müəssisələrinin İnternetə çıxışını təmin edən digər təşkilatlar da mövcuddur və AzRENA onlarla sıx əməkdaşlıq edir. Buna misal olaraq IREX/IATP və OSI çərçivəsində yaradılmış infrastrukturun əsasında Azərbaycanın 4 universiteti və 2 beynəlxalq təşkilat tərəfindən əsası qoyulmuş Azərbaycan Elm-Təhsil Kompüter Şəbəkəsini (AzNET), AzRENA və Azərbaycan İnternet Cəmiyyətinin təsisçilərindən biri olan Bakı Elm-Tədris Mərkəzini göstərmək olar. Gələcəkdə Bakıda və regionlarda AzNET və AzRENA şəbəkələri arasında iki mübadilə məntəqəsəinin quraşdırılması planlaşdırılır.

Təhsil və elm müəssisələrinin İnternetə çıxışını təmin edən müxtəlif təşkilatlarla əməkdaşlıq, trafiki optimallaşdırmağa və Azərbaycanda ümumi texniki Akademiya Təhsil Şəbəkəsini yaratmağa imkan verəcəkdir.